【新增回應】

香港電影評論學會今日公佈2018年度「第25屆香港電影評論學會大獎」結果，陳果的《三夫》成為大贏家，包辦最佳電影、最佳導演同最佳女演員，最佳男演員由黃秋生《淪落人》奪得，秋生喺戲中演一名傷健人士，由一名外籍傭工照顧，一段主僕情賺人熱淚。最佳編劇亦由《淪》片奪得。

秋生透過短訊回應話：「吓？咁邪？噚晚我抹下以前個獎座，見到有兩個，心諗，蝦！幾時攞多個放喺度三個就靚嘞。跟住睇粵語長片，一部怪雞戲，睇下個名叫乜先，叫《得咗》。 恭喜阿小娟（導演陳小娟），希望部電影多啲人睇。多謝大家咁鼓勵。」秋生今次係第三度成為評論學會最佳男演員，係繼98年《野獸刑警》、02年《無間道》後，事隔16年後再奪此獎。

而失落金馬獎嘅大陸演員曾美慧孜，終於憑《三》片成為評論學會最佳女演員獎。佢喺《三》片中，由頭到尾都冇對白，雖然佢同戲中男對手，有唔少情慾鏡頭，完全靠身體語言來演繹，亦帶出老夫少妻，為生活而靠做妓女維生嘅故事。曾美慧孜回應獲獎:「大家好！我係小美，曾美慧孜。多謝香港電影評論學會
給我的肯定和鼓勵，多謝陳果導演給我這個機會。這部電影是我第一次做女主角，好難忘的經歷和成長。我鍾意香港，多謝大家期待頒獎當日同大家見面，在這個月底我更會率先到香港，同觀眾見面，到時候見！」

另外，評論學會推薦5部電影，包括：紀錄片《水底行走的人》、《淪落人》、《無雙》、《自由行》及《G殺》。當中《自》片被禁止喺大陸上演。

杜汶澤主演嘅《G殺》獲推薦電影，佢話：「接拍呢部電影時，因為電影出品人邱禮濤邀請，我聽到角色演繹黑警，我一口應承咗，因為我一路好想演一個黑警嘅角色，恭喜導演李卓斌第一次拍戲就咁成功，我自己都未睇呢部戲，聽講口碑都好好，我自己都好期待。」

精選娛聞，喺晒《娛果》
http://fb.com/appledailyent