前幾日喺中環間gym撞到舊同學小燕，佢問附近有咩餐廳食晚飯出名，我咪攞部iPhone4（圖）出嚟上網check吓，check完就落地庫更衣室，放手機入locker，走去跳ZumbaFitness。
跳咗一個鐘，諗住攞返部iPhone，點知一上手部機好熱，仲冇晒電，以為會爆炸，但叉返電部機都開得返。我每次做運動都放iPhone入locker個幾鐘都冇事o架。

搜尋網絡耗電大出問題

之後第一時間去先達問3C達人Lo哥，佢話造成呢個問題，好可能係兩種情況，第一係我開咗上網程式，然後放咗喺一個接收差嘅地方，部iPhone會不斷search　3G網絡上網，如果部機又開埋WIFI，又會不斷再搵WIFI，「更衣室喺地庫，接收應該差啲，部機咪不斷搵網絡，咁樣好嘥電」。
他說，另一可能性係，部機嘅網絡供應商set錯咗，例如你用數碼通，但就冇set到或者set錯咗，部機咪不斷咁搵電話網絡。佢話唔用部iPhone住可以熄機，或者關咗上網程式，最好關埋個WIFI。
理大機械工程學系工程師盧覺強話，手機長時間耗電會發熱，「講得電話耐都會熱啦」，而搜索網絡都係耗電量大嘅程式。他又話，若將手機放入locker，應避免手機俾衣物包住，因為會阻礙散熱，影響運作。

電郵：mailto:[email protected]