芸芸上市公司CEO之中，聯想（992）嘅楊元慶都算係數一數二「四正」，但咪睇佢官仔骨骨、靚靚仔仔咁，查實佢都係由低做起，而且仲係好鬼勞動、好鬼捱得嗰隻！
聯想首席財務官黃偉明話，楊總十幾年前加入聯想嗰陣，係由送貨仔做起，除咗要踩住部單車四圍去，將電腦逐家逐戶送上門，仲要幫啲客做埋裝嵌，絕對無花無假，係「紅褲仔」出身！
所以呢，佢對聯想上上下下嘅認識可以話非常深入……well，幾時都話莫欺少年窮，千祈咪睇小上門幫你裝寬頻、裝電話嘅師傅仔呀，分分鐘第日係你跟佢搵食o架！

當年送貨仔　家賺過億

咁聯想點解係講踩單車而唔係講電腦嘅？係咁嘅，黃總話，公司上季業績靚仔，當中嚟自核心中國市場分部業績溢利增幅就高達44%，關鍵係在於快人一步搶灘，家聯想喺內地滲透嘅市場，唔單止3、4線城市，更無遠弗屆去到人口只有1至2萬人嘅鎮仔。
有呢個成績，全靠聯想喺內地嘅幾千個代理商，而呢班人，好多都跟咗聯想十幾年，當初個個都係踩單車送貨，家就好多都揸「賓士」，跟住聯想成長兼賺到過億身家。
呢啲咁緊密嘅關係，唔係外資可以喺短時間建立到嘅！華華淨係想知道，聯想仲請唔請代理或者送貨呢？

李華華
mailto:[email protected]