早前簽約重返曼聯嘅瑞典前鋒伊巴謙莫域會著10號波衫，好多人都已經知道。但係佢點解著呢個號碼呢？

伊巴謙莫域禮拜四就喺個人Twitter上載咗一張有十件印住「10」號曼聯波衫嘅相，仲加咗句「我從來無走過，只係upgrade咗自己個冧把！」家陣35歲嘅伊巴謙莫域喺今年4月膝頭哥受傷，原本話要明年初先復出，不過紅魔鬼早排同佢簽返約，又寫埋佢個名落歐聯名單。由於歐聯分組賽係踢到12月頭，種種跡象都顯示伊巴謙莫域會提早復出。佢上季喺各項賽事上陣46場，入咗28球，如果真係有個upgrade咗嘅伊巴謙莫域返嚟，咁就真係不得了咯！