新股一隻接一隻掛牌，惟掛牌後表現卻一再令人失望，除國藥控股（1099）及中國全通（633）之外，其他9月掛牌之新股全軍覆沒，國慶假前上市的華南城（1668），最多勁跌30％，收市仍跌近23％，抽中新股即日勁輸兩成幾，應是近年首日表現最差新股。
新股熱潮退卻，對於其後上市的公司肯定非常不利，定價固然難望進取，就連是否能夠成功上市都成問題，日前就傳出糖王郭鶴年家族旗下新加坡上市公司豐益國際的內地業務，原計劃於10月中公開招股，現在因氣氛欠佳而「縮沙」，延遲上市。

新股熱退成交縮俱利淡

豐益是內地食用油生產商龍頭，估計集資額多達20至35億美元，此巨無霸假如擱置上市，港交所（388）頓時冇咗一大筆收入。
唔靠新股，左右港交所主要收入的港股成交更靠唔住，近月港股成交持續低迷，本周二、周三更跌至不足500億元，大行亦乘勢狂踩港交所。美林發表報告，重申港交所跑輸大市的投資評級，目標價132元。美林指，港交所現價已相等於2010年度預期市盈率超過26倍，估值明顯偏高，港股日均成交要達900億元，才足以支持港交所企於現股價，但以過往紀錄，恒指要達25000點，大市日均成交才可達900億元，縱計入09年下半年及明年的新股，對大市成交額提升的幅度也有限。如睇淡大市，造淡港交所有雙重理由。港交所假前報140.50元，跌1元。
歐陽風