何超蓮處女廣告，就係MEKO（美果）全新推出嘅「蘋果紅茶」及「蜜桃紅茶」。咁點解超蓮會接MEKO（美果）Smiley果茶系列嘅廣告，原來係……佢哋嘅概念一致，都係以會心微笑為主題，超蓮話：「好似我做嘅charity一樣『Smile with us HK』好啱，主題係開心正能量，飲完會開心會笑。」除此之外，飲品品牌「道地」更積極與Smile with us HK於五月籌備另一項慈善活動。

第一次面對鏡頭嘅超蓮講番拍攝過程：「不嬲唔係好識影相面對鏡頭，我好驚會拍好耐，阻人收工，導演講晒個故事，教我點樣做，睇住個鏡頭，拍嘅時候放鬆咗好多，呢首廣告歌我好鍾意，好輕快，好開心。平時都爭幾遠，要我跳舞，聽住歌，現場好多拍攝嘅人，我面皮又唔係特別厚，我覺得好尷尬，氣氛唔係好大壓力，跳完第一次，第二、三次都好好，無over run，所以都係一個幾好嘅拍攝。」

今次超蓮都有好多新體驗，佢話：「今次好特別要俾表情，就有一個animation狗仔小吉，現場係見佢唔到，好多反應做好多對手戲，第一次嘗試，幾好玩，好多想象空間，拍攝充滿笑聲。」

超蓮話自己好鍾意笑，係一個好正面嘅人，佢話：「笑係一個BB天生識笑，一個人面對咩情況，你都可以選擇自己情緒，可以開心同唔開心，好攰提下自己笑。」咁遇到不滿，負面情緒，又點樣發洩？佢笑笑口話：「食嘢同埋做運動，好極端，好唔開心食咗嘢先，因為食完覺得好肥，開始好負面，就會衝去做運動，呢兩樣嘢都會做，係我情緒唔好，做運動出一身汗，將視線轉移，食嘢飽咗又會開心啲。」