不受歡迎又不獲信任嘅煲呔，今日起見議員諮詢政改方案意見，噚日先禮後兵請議員到禮賓府食晏，未開席前講明只談風月，希望大家忍手唔好急於抦佢。客隨主便，結果大家多談情，不談政。
噚日筵開七席，兩個準新郎哥涂謹申、曾鈺成巧合坐喺主家席煲呔兩旁。據其他同枱議員稱，煲呔一坐低就問阿涂、阿曾幾時係好日子，不過無講係咪想到場飲或者做定人情，阿涂則打蛇隨棍上，邀請煲呔喺佢結婚當日到場，最好可以唱首歌當賀禮。但煲呔話最怕唱歌，只會喺教堂唱喎；阿涂唔罷休，話啱晒，建議煲呔唱《AmazingGrace》等詩歌，可惜煲呔堅持唔開金口，話自己唱得差，盞掃興。
煲呔之後轉話題，話白頭到老有數計，幸福方程式係太太嘅年齡，最好係丈夫年齡除二再加10，近日傳出喜訊嘅中大校長劉遵義同準劉太麥嘉軒，男65歲，女43歲，正好符合呢條幸福方程式，煲呔話兩人應該好夾。

幸福方程式受質疑

有議員對此說法不以為然，職業病發作，要求煲呔提出方程式準確證據，「政府可否告之本會，究竟根據政府離婚資料、數據，呢條方程式正唔正確？」官員對議員提問多數唔理，煲呔亦然。談婚論嫁講到興起，煲呔問在席人士邊個結婚最耐，公民黨余若薇話明年就結婚30年，中策組佳叔話自己結婚37年，耐過余若薇。呢個時候煲呔突然晒冷，好得戚咁講：「唓！如果咁樣，我最耐啦，成40年喇！」
據煲呔稱，佢15歲就認識太太鮑笑薇，相識50年，真正青梅竹馬，余大狀問煲呔，曾太係咪佢初戀情人，點知煲呔口窒窒咁話，好怕問老婆自己係咪佢初戀呢個問題。煲呔答非所問，議員繼續追問，但煲呔好口密，「呢個係秘密。」
講到舊部下米老鼠出新書，煲呔都有幫襯，卻嫌物非所值，「本書120蚊，個半鐘頭就睇完。」又話睇完後已轉送下屬，等其他人慳番喎。

mailto:[email protected]