越多人討論黃色經濟圈，越多人提出歪理謬論，例如早兩日商務及經濟發展局長邱騰華跟網民「對話」（哲學問題：你可以跟錄音機對話嗎？），就指出香港經濟結構從來不單一，以黃、藍政治立場區分不同經濟圈，或以某類特定先決條件去決定光顧哪類店舖，並非港人一直信奉原則，「全世界都冇人劃地為牢，睇唔到呢樣嘢可以點持續落去。」他又認為，若港人信奉自由經濟，就應讓商戶透過服務及品牌吸引顧客。

這個經濟零分（政治也不見得高分）的答案，竟出自一位管轄香港商務及經濟發展的高官之口，真係唔知點反應好。

沒有特定先決條件去消費的，肯定是奇人異士。難道局長你會合埋雙眼隨機抽籤決定去邊度食飯？商戶為利益驅使，真黃扮黃各出其謀去吸引顧客，又點樣同自由經濟有衝突？

我不知道局長真傻定扮蠢，只知道類似言論會以不同形式不斷出現。為大家免受荼毒，我今日就提供一段簡單易明的「黃色經濟圈簡述」，藉以對抗愚昧、維持智商：

「黃色經濟圈係一個經濟現象，唔需要由上而下嘅策劃，亦唔需要乜乜『大台』中央集權。就好似有人鍾意買有機產品，有人堅持飲公平貿易咖啡，有人鍾意少油少糖，有人鍾意食齋，黃色政見只係個人喜好，有需求自然就有供應。商戶為消費者提供黃色消費體驗，亦係自由經濟正常運作下嘅結果。之不過，喜好有代價，黃色要求太高就難免賣得貴，但市場自然會搵到均衡點，畀消費者去滿足佢哋唔同程度嘅黃色生活。撐黃拒藍嘅香港人越多，越多黃店生存，就係咁樣！」

曾國平
美國維珍尼亞理工大學經濟系副教授
http://fb.com/economics3.0/
-----------------------
屬於香港人的移民攻略
立即登入【全球樓行】
Dream House零距離