圈中出名恩愛嘅夫婦陳豪同陳茵媺（Aimee），膝下有兩子一女，全部都精靈得意，眨吓眼，大仔陳梓燁（Aiden）今日5歲，陳豪兩公婆當然有為個仔慶祝，今日Aimee就喺Instagram貼相，佢以英文寫住：「當Aiden今早起床時，他講的第一句話是『早晨媽咪！多謝你生下我。』親愛的，你是上天給我最大的禮物中第一份來到的，我不能相信自己有多幸運，可以擁有這樣成熟的又體貼的兒子。你是媽媽的一切，令所有無法合眼的晚上都變得值得。祝我的絕地武士5歲生日快樂！」Aimee更明言自己非常愛囝囝。

睇番啲相，成個生日會都係《星戰》主題，除咗壽星仔化身黑武士之外，生日蛋糕當然都係星戰為主題，上面都印晒《星戰》角色，仲寫住「Aiden Happy 5th Birthday」。而Aiden同兩歲大嘅妹妹陳凱婷（Camilla）仲用激光劍「對決」，場面溫馨搞笑！

另外，Aimee個好友戚黛黛亦特地做蛋糕賀Aiden，由媽咪Aimee代收，當日收到蛋糕嘅，仲有曹敏莉及朱凱婷，相信係用嚟送俾12月9號生日嘅曹敏莉細仔Leo，及喺12月13日生日嘅朱凱婷囡囡林穎彤（Sheryl）。

精選娛聞，喺晒《娛果》
http://fb.com/appledailyent