51歲嘅郭富城喺今年完成兩個重要嘅人生大事，先係喺今年4月同大陸女模方媛（Moka）結婚，正式成為人夫，前日又喺微博貼一家三口勾手指相，宣佈榮升爸爸兼留言：「開心！我們仨！」(新聞連結： http://bit.ly/2yjyEdI )

今日有周刊報道，本來Moka嘅預產期喺9月中，點知喺9號嗰日有作動嘅跡象，本來喺佛山開工嘅城城，收到通知之後，即刻漏夜趕返嚟香港，Moka喺10號生咗B女。做咗爹哋嘅城城，喺劇組嘅配合下，可以有一個禮拜嘅湊女假期，聽講囡囡眼大鼻高，同爹哋成個餅印！

城城接受周刊嘅訪問，佢話第一次抱住BB嘅感覺好難去形容，望住BB，好似抱住迷你版嘅郭富城，嫲嫲當然覺得好開心。城城o依家已經回歸劇組，佢除咗每一日同老婆視像之外，一有空檔就會返香港湊b。

而城城選擇噚日公開一家三口拖手相，即係囡囡出生嘅第十二日，亦即是係中國人傳統嘅十二朝，有指會喺當日向親友派薑醋，而孕婦亦可以開始進補。