薛凱琪(Fiona)今日喺商台宣傳新碟《你我之間》，大碟9首歌係Fiona整體嘅愛情故事結集而成，仲搵嚟方大同做唱片監製，Fiona話隻碟已經籌備咗6年、錄音錄咗4年，因為佢要同方大同夾時間有一定難度，不過最終都已經錄晒歌，Fiona話：「我成日覺得戀愛係最重要，愛一個人唔可以用一隻歌去代表，所以今次用9首歌做出我整體嘅愛情故事。」

Fiona話為表誠意，9首歌都會拍MV，佢仲會一半都係自導自演，其中一首《Don't let it go》仲請嚟周國賢合演情侶，Fiona話：「對上一次合作已經係《目黑》，佢靚仔之餘仲想拍到好童話式、係好單純嘅愛，我哋有好多身體接觸，佢好感性，喺我頸邊對嘴時喺度喊，佢真係好適合拍戲。」Fiona仲話想環保啲，嚟緊都盡量唔出實體版，以後出碟都會考慮出box set畀歌迷留念。

另外，提到有傳佢約滿後會簽約麥浚龍公司，Fiona直認未有方向，佢話：「依家拍緊劇，之前同Paco食飯都有同佢解釋，如果我有傾新公司，我會同佢講，等我2月10號拍完劇先再傾，優先權會同公司傾咗先，我怕條件傾得唔好。我都唔會講有邊間公司approach，要尊重番。」

更多娛聞，喺晒《娛果》
http://fb.com/appledailyent