無綫新劇《鐵馬尋橋》噚日喺將軍澳電視廣播城試造型，監製李添勝除咗搵鄭嘉穎、楊怡、湯盈盈、馬國明擔演外，仲有元秋同埋中國星老闆向華強個仔向佐。
初到貴境嘅向佐，似乎唔太熟悉啲藝員同事個名，問佢會同邊個有多啲對手戲時，佢淨係話：「姓榮嗰啲就係我屋企人，冇乜其他對手嘅感情線，角色會由奸變忠。」講完之後佢同記者一齊睇返個人名表，原來佢喺戲入面同林嘉華、惠英紅、李詩韻做一家人。
講到今次同無綫嘅合作關係，向佐話：「我哋係部頭形式合作，簽咗一、兩年合約，其實我做乜嘢角色都冇所謂，好想試多啲新嘢。」問到佢去電視台拍劇會唔會擔心有緋聞纏身？向佐話：「我有心理準備會傳緋聞，不過都係工作啫，我唔會理其他。」問到向生向太有冇乜嘢意見？向佐話：「佢哋叫我勤力啲。」講完工作，問吓佢同Race嘅最新發展，向佐即刻面紅紅話：「唔知佢點喎，你哋問番佢啦！」

嘉穎元秋演夫妻

向佐仲話自己呢排好開心，問佢係咪因為愛情事業兩得意？佢又面紅紅話：「唔關事，我覺得呢排多嘢做，家又拍劇，而且我嘅新碟又籌備得七七八八啫！」
另外，鄭嘉穎今次喺戲度會一人分飾兩角，先做元秋後生嗰陣嘅老公，跟住又會變成秋姐嘅仔，做得秋姐個仔，當然要識得打功夫，所以嘉穎話呢個係新嘗試，會盡力去打，仲希望喺秋姐身上偷師。自稱係演技派嘅秋姐，本來今次可以同元華合作，不過因為檔期問題，由林嘉華頂上。對於有記者笑秋姐可能會辛苦過喺內地拍劇，而且酬勞又唔高，秋姐就話：「我都係第一次同無綫合作，冇所謂，最緊要係拍得開心，咪當試吓新嘢囉！」