當年今日

搵袁家班幫拖暑假打餐飽
狄美勁減20磅惡鬥俏嬌娃

蘋果日報 2003/05/25 00:00


由金美侖戴雅絲(CameronDiaz)、杜莉芭里摩亞(DrewBarrymore)同劉玉玲主演嘅《神探俏嬌娃2指環密令》,下個月底就會喺香港上映。
今次監製杜莉為咗增加套片嘅噱頭,重搵埋outout哋嘅狄美摩亞(DemiMoore)助陣做奸角,人氣跌到幾乎係零嘅狄美可唔可以鹹魚翻生,認真要睇呢鋪啦!

尋找機密指環
今集個故事係講三個俏嬌娃,為咗搵番兩隻載有聯邦機密檔案嘅戒指,而去調查一個壞事做盡嘅罪惡集團,而曾經做過俏嬌娃嘅狄美摩亞,原來就係佢哋要對付嘅壞人。
我羅拉聽講狄美一簽咗呢套戲嘅合約之後,因為要同三個後生女鬥搶鏡,已經即時瘋狂操弗自己,勁減二十幾磅。
自從九六年拍完《脫衣舞孃》之後就冇脫過嘅狄美,今次喺戲入面重會賣大包着比堅尼上陣,雖然佢已經成四十一歲兼生咗三個女,但就依然keep得好fit,比起擁有四十四吋長腿嘅金美侖,真係一啲都唔輸蝕。
今次呢套片係由香港嘅袁祥仁做武指,擺明車馬sell水着靚女之餘,實唔少得飛車同踢腿,當中重有唔少特技同爆炸場面,一定夠睇頭嘅!