當年今日
關於我們

【Eason fb live】扮Ellen講「真係㗎?」 吹神自爆有三個靈魂唔使瞓

蘋果日報 2018/08/30 18:18

ellen三個靈魂吹神盧凱彤eason

Eason今日喺Live入面,講完新碟《L.O.V.E.》,又講吓新歌《可一可再》,之後就接受Fans提問同玩遊戲。
喺遊戲部份,第一題就係要模仿DUO Band其中一位成員表情,Eason擺出一副望向天花板、思考緊嘅樣,:「冇辦法,我第一個諗起阿妹(盧凱彤/Ellen),佢成日都咁樣,之後同人講『真係㗎』。」Eason話任何人同Ellen講任何事,Ellen都係會答:「真係㗎?」
問到喺Band入面邊個最懶瞓?Eason吹神上身:「我真係唔使瞓,邊個懶瞓真係唔知。」咁點解佢唔使瞓呢?佢開始狂吹喇:「我有3個靈魂,其他兩個瞓緊,我就活動,全香港有8個人有3個靈魂,我就係其中一個。我有一個係天使嚟,一個上一世係英國女人,一個人就係另一個星球嚟。」今世呢個陳奕迅就變咗一個識唱歌、好易對英國有親切感,好有healing power,用音樂嚟heal人嘅人。
有網民問到,因為新碟叫《L.O.V.E.》,咁Eason對「愛」有咩睇法?佢話:「其實我覺得有人嘅地方就有愛,有動物寵物都有愛,對寵物個種愛,係純粹啲,你唔明佢講咩,但佢嘅動態你係會明。依家有時候,我會享受呢種多啲,我唔會公開講太多嚴肅問題,因為身份問題影響好大,你可以話我慎言咗。」
講起演唱會,好多人都期待Eason騷肌?不過佢就話唔鍾意騷肌。有記者問:「有咩?」Eason話:「我記得小學時有,仲同阿媽講!個時有5嚿。」佢又話劉浩龍啲腹肌好勁,唔使谷都已經好勁,不過佢話:「成排朱古力咁,咁咪成日都肚餓。」
精選娛聞,喺晒《娛果》
http://fb.com/appledailyent