四年前傘運催生咗唔少「藍絲」組織,但齋講唔做都冇乜意思,八方喺9.28前為佢哋埋單計數,睇吓邊個組織開工最密最勇武,最值阿爺放水領功勞,結果「愛港之聲」、「幫港出聲」和「保衛香港運動」最勤力,成立至今見報次數位列三甲;近年冒起嘅「珍惜群組」就最勇武。
港大學者戴耀廷2013年初刊登文章談及公民抗命爭取普選後,唔少藍絲組織相繼成立,「收工男」傅振中牽頭嘅「保衛香港運動」同年6月誕生、周融牽頭嘅「幫港出聲」8月登場;由商人高達斌成立嘅「愛港之聲」更於2012年底已經成立,除支持梁振英,多次開工反佔中。
《蘋果》用「慧科搜索」引擎統計,發現多個藍絲組織由成立至本月初,被報道次數逾千次,其中「愛港之聲」、「幫港出聲」和「保衛香港運動」開工次數較多,於香港媒體被報道次數分別為2,537次、2,220次和1,352次;除咗因為反佔中見報,近年因「港獨」議題又有機會開工。