一到夏天，無綫通常用水上活動嚟谷劇，好似今日就有陳展鵬、陳自瑤（YoYo）、姚子羚新劇《天命》，玩下水戰淋下冰筒，場面都…幾「踩界」0架，好睇過眾男藝人除晒上衣半裸得番陳展鵬仲著Tee。

話明水戰，當然係兩陣對壘，玩騎膊馬互推對方落水，女上男下，出名好玩得嘅何雁詩被派騎住陳展鵬。陳展鵬已經戴咗帽，但何雁詩變種「二字鉗羊馬」夾住、小腹頂住陳生個頭，都頗有壓迫感。影相嗰陣何雁詩仲胸壓對方，真係好豪邁。

到淋冰筒嗰陣，班女就拉開陳展鵬衫領掉啲冰粒落去，陳展鵬以彼之道還施彼身對付姚子羚……當然冇「were」開女方嘅衫領，只係掉啲冰落佢條頸，等佢哋自己「瀡」落去……

向對手痛下殺著嘅YoYo，早前同王浩信合體出席囡囡嘅畢業活動，王浩信因囡囡樣子被網民批評，決定發律師信。YoYo受訪時亦話唔希望囡囡個樣曝光，想保護小朋友。之前YoYo不時擺兩母女自拍上ig，王浩信間唔中都有，但個女都係戴上墨鏡，或者只影半張臉0架咋。

另外，今日係王浩信35歲生日，YoYo話前一日已經食飯慶祝，今天就留俾佢同fans慶祝。至於送乜嘢生日禮物，佢就話要保密，至於個女就親自揀生日蛋糕送俾爸爸。