政務司司長林鄭月娥早前憶往事，話自己讀書時只歷史性試過一次唔係考第一；資訊科技界立法會議員莫乃光（Charles）就同林鄭相反。52歲嘅佢中學就讀香港華仁，佢話讀書成績一般，點知中四上學期坐喺年年考第一嘅同學側邊。唔通勤力都會傳染？佢嗰個學期首嚐人生第一次，打破埋高材生鄰居嘅不滅神話！

Charles憶述中一開始比較奀皮，成日被老師安排坐喺班上單丁位－即係老師面前第一個位，以便嚴密監控！喺港華嘅「威水史」包括攞咗班長嘅點名簿，幫走堂嘅同學個個加返個「剔」，係咪好夠義氣呢！

雖則成績唔算標青，但原來佢細細個已經想到外國升學，所以中六後留學美國普度大學讀電腦及電機工程，同班唔少同學同樣等住放洋，「所以中六嗰個學期返學好hea，有啲老師都叫我哋畀下面，唔好『肥佬』，我哋掛住搞同女校嘅活動，哈哈。」

咁係咪細細個對電腦科技嘢已經好著迷？又唔係噃，「唔記得中五定中六，成班得兩個同學有個人電腦，我試過去佢屋企玩，嗰時係首度接觸電腦」，赴笈美國後越讀越有興趣，之後讀埋美國普度大學電機工程碩士。Charles話留學當時資訊科技唔發達，「有同學訂香港報紙，我會借嚟睇，但啲新聞已經過咗兩三日，邊有宜家一上網就乜都有？」