一直強調自己係「中國人」嘅愛國孝子溫兆倫，今日突然有感召，再次驚覺自己原來仲係香港人！到底愛國溫受到啲咩刺激令佢再有感召？咪就係年初一喺旺角發生嘅警民衝突事件囉。

愛國溫今日連出4個post去講今次衝突事件，話自己睇到新聞好痛心，又話唔想見到個家變成咁乜乜乜，真係隔住個mon都感受到佢幾咁愛香港。難得的是，呢位愛國孝子，移居大陸已久，仍然咁關心香港，唔知佢依家仲係拎緊香港身份證，定係已轉為大陸國籍呢？

愛國溫除咗騷下自己沉重嘅心情之外，仲要予以譴責。譴責邊個？係譴責一眾藝人，同佢哋嘅fans！

「再這樣下去美麗的香港如戰場，早前正義凜然支持佔中的香港藝人都跑哪去了？還有那些擁有正能量並有強大影響力的演藝圈工作者也跑哪去了？為甚麼不說話勸諭你們的粉絲理性地三思而行？為甚麼？」

咦？愛國孝子呢個全新嘅角度，又真係無人提出過噃！唔知佢係點樣知道當晚嘅市民都係某某、某某同某某香港藝人嘅fans呢？

正所謂愛之深責之切，淨係譴責一次又點夠？愛國溫好快喺微博自己回覆自己，鬧爆香港藝人唔記得咗自己係香港人嘅身份：「香港的明星，名人，自稱滿身正能量的都在忙拍戲，開演唱會，拍廣告，家裏有事還是怕惹禍上身？大家都求自保嗎？你們和你們的粉絲的力量在哪裡？為甚麼不發一句話來支持我們自己的香港警隊？你們TMD在等什麼？香港是我們的家園，我們出生的地方！你們還記得自己是香港人？」

喂呀！「香港是我們的家園，我們出生的地方！你們還記得自己是香港人嗎？」有網民就質疑，此話似有弦外之音、擺明曲線咁鬧緊自己啦！但係篇文係喺強國人常用嘅微博度發放，咁究竟佢當自己係乜嘢人呢？