無綫近年起用舊將回巢力挽收視，將十年前經典作品延續第三輯《溏心風暴3》，故事舊瓶新酒，集中火力講家族爭產，為錢反目衍生事端。舊將之一夏雨當年離開大台後曾遊走香港電視同Viu TV合作，夏雨早前喺九龍灣接受訪問，佢認為即使無綫養咗佢幾十年，好似家一樣嘅感覺，適當時候都要出去闖蕩，今次回巢不計勞苦廉價合作。

夏雨同無綫關係仍然保持良好，佢話：「有需要或角色啱我，時間許可隨時返嚟，尤其《溏心》一、二集咁好成績，台前幕後原班人馬繼續，聽到已急不及待，錢我都冇講就去拍。」夏雨直認今次收入比預期中少，心中有數話：「比起大陸真係暱埋都得，冇得講，巿場唔同，少極都好過之前兩部，以為好多，其實都係好少。」雖然只係微利，夏雨對《溏心》呢份情意結睇得好重，佢話：「我好想拍，世界就係咁奇怪，當拍完一、二集幕前幕後都走咗，相隔九年，由好渴望想拍，到見到現實環境冇乜機會拍，已經淡忘，又遇著劉家豪哥（劇集監製）返去開經典劇，當時好渴望參與，錢已唔記得咗，被渴望沖昏頭腦。」

夏雨近年投資製作公司拍電影，一嚐監製同執導滋味，綜合唔同崗位，夏雨話：「演員係算舒服，睇好劇本做好角色就完成個人任務，監製任何一範都有份，由搞劇本、埋班、搵導演、上畫、宣傳樣樣有份。」試過種種經驗後，夏雨覺得一人唔能夠同時分身做幾樣崗位，會互相矛盾冇一樣做得了色，o依家會專注做監製多。

夏雨囝囝黃奕晨現效力Viu TV，作為爸爸會欣賞兒子努力，日後開電影有適合都會搵阿仔參與，夏雨話：「佢始終新，見到佢有進步，等佢碌下啦，有機會會搵佢，一定要啱先得，唔係人哋話開陣戲都俾個仔做就唔好啦。」夏雨給予囝囝最大要訣：「唔好怕辛苦同艱難，呢個圈或界上唔會有免費午餐俾你，要付出好多先會有收鑊，等阿仔捱下先啦。」

場地提供：華星冰室

更多娛聞，喺晒《娛果》
http://fb.com/appledailyent