李小龍不單好武,對跳舞亦有一手,年少時他跟弟弟李振輝贏過舞蹈比賽。除弟弟外,李小龍的舞伴包括已故丑生王、喜劇泰斗梁醒波的女兒文蘭。文蘭跟李小龍青梅竹馬,在電影《李小龍》中亦有她的角色。今年82歲,已息影54年的文蘭姐(原名梁葆文)是粵語片一代女神,當年曾迷倒不少少男。前年出席父親「梁醒波誕辰110周年放映禮」時風采依然,精神奕奕,前晚《邊緣人》導演章國明跟文蘭姐茶敘嘆咖啡,導演將二人合照放在facebook分享,留言「又見文蘭姐,一齊食大餐,多謝晒Hezek。文蘭係邊個?佢係粵語片明星,梁醒波女兒,李小龍嘅好兄弟&舞蹈拍檔&車手。嗰時李小龍四處搵交打,文蘭姐負責專車接送,車佢去打人,打完人就車佢走鬼!」
章國明今日接受《蘋果》訪問,他透露二人結識緣於朋友飯局,他說︰「對佢強烈印象嘅係喺一個我都有份被訪問嘅李小龍紀念電影裏面,睇到佢講同李小龍嘅奇妙老友關係,十分精采,過癮到飛起,然後大約兩三年前,好友飯局,佢就坐喺我隔離,開心到飛起,成晚同佢傾偈,大家之後就耐唔耐喺WhatsApp度傾偈,有時都會傾吓人生觀,佢實在係一個香港寶藏!」他又爆文蘭原來不喜歡做演員,甚至自己第一部作品《嬌嬌女》亦沒有完整看完。席間還講起李小龍少時的逸事,李小龍被老竇李海泉送去美國前,文蘭姐因為要在醫院做手術割盲腸,所以沒有去送船,李小龍就叫李振輝送了一張字條過去,話「希望個醫生劏開佢兩份」。文蘭姐講起自家事笑言七兄弟姊妹試過窮困時,不是人人有床瞓。