前晚喺遮打花園舉行嘅反對人大釋法燭光集會，班大律師不但參加，重大開金口唱歌，首歌叫做《心照心》，由湯家驊作曲填詞。甚少露面嘅湯太楊蕙蘭同梁家傑太太陳淑儀都有到場打氣，重出場唱埋一份。八方問湯太係咪支持老公而嚟，點知佢話係要嚟同港人一齊唱。湯太亦係法律界人士，平時好低調，相都唔多想影。

北京幫集會造數
問兩位大狀太太點睇丈夫參選？兩人都異口同聲話尊重老公嘅決定，真係賢內助。湯家驊同梁家傑嘅另一半全力挺夫，余若薇嘅醫生丈夫胡健維一樣係太太嘅擁躉，八方見佢同個女喺會場默默支持，等余大狀等唱完歌，先坐車離開。
班大狀真係又做得又玩得，為呼籲多啲人登記做選民，同埋聽佢哋個電台，重印製咗張好靚嘅書籤派發，你認唔認得邊個打邊個？
唔知係咪見班大狀咁落力唱歌，今次連北京都幫佢哋一把，唔係停止釋法，而係八方噚日打開份英文《中國日報》，竟然有報道前晚反釋法燭光集會嘅情況，最離奇係將大會公布嘅參加人數三千，自行加碼到一萬，幫班大狀「創造」多七千「歌迷」，算畀足面喇！