【金手指】舖王波叔耐人尋味(孫柏文)
孫柏文金手指舖王
「舖王」鄧成波(波叔)父子,近日向銀行及財務公司撲水。
噚日睇《蘋果》報道訪問「舖王」鄧成波(波叔)。一睇,孫柏文眼都凸。
記得2008年尾,蕭若元搞緊佢嘅網台,咁就叫咗好多𡃁仔𡃁妹逐個去見佢。傾吓有冇得為佢效力,其中包括我同李兆富。
當日我哋兩個上燒山個office,佢個仔蕭定一都喺度,坐佢老竇旁,同我哋一齊傾吓。喺嗰排金融海嘯席捲全球下,當然有傾埋市場情況,特別係啲銀行嘅舉動。咁蕭定一就同我哋分享,話佢哋間上市公司幫襯開啲銀行,都收水。
傾咗大約一個鐘後,我哋就走。咁入咗𨋢,睇住度𨋢門一閂實,得返我同李兆富時,我就話:「蕭定一,係咪啱啱同兩個財經傳媒工作者爆出,佢間上市公司被call loan?」李兆富就答:「你見唔到蕭定一一講完,蕭若元塊面即刻燶晒咩?」我再話:「咁如果我哋寫出來會點?」李兆富笑一笑,之後我哋就喺肅靜下搭埋餘下嘅𨋢程。故事教訓,債仔係永遠都唔可以認被call loan、手緊等等。
所以,當我見到鄧成波非常坦誠咁認,仲要自我踩多兩腳,話不但銀行借爆,仲要財仔借到30厘時,我真係諗唔通。82、97、03都活過嘅老江湖,自爆玩緊乜?耐人尋味啊。
最初,我呢啲低級財演喺度諗,其實佢係咪想引發啲人嘅貪婪。專登塑造一個「唔掂」嘅形象,等啲人知佢啲嘢乜都賣,仲要會係筍價。將嗰篇報道,變成一個最有公信力嘅全版免費地產廣告。
諗唔通下,我就問我最鍾意玩財技、借貸、風險管理出神入化嘅朋友,解吓我個迷津。佢話,無啦啦咁講,應該係想阻止自己啲仔女做傻事。我話,係咪有如報道話個仔搞酒店,老人家覺得燒錢唔同意,所以大爆。佢話,應該唔係,嗰啲圍內cut水喉就得,唔使公開。
佢話,可能係仔女情竇初開,老人家驚佢俾人呃。騙情呢家嘢,cut水喉都冇用。所以就行出來,話自己好唔掂,打發走啲「搵食」嘅人。有冇理?我只係知道,報紙報道,絕對準確。任何猜測,都係錯的。謝謝。
移民英國全攻略
一連四場Webinar 專家團隊直播解答
第二場6月22日晚上9時播放
全球樓行 x 籽想旅行
詳情登入:
【港人大遷徙.英國篇】 -----------------------------
-----------------------------
屬於香港人的移民攻略
立即登入
【全球樓行】 Dream House零距離