唔少政界因網民狂轟而轉軚撐派錢，一早表明唔贊成全民派錢嘅會計界立法會議員議員梁繼昌（Kenneth）堅持企硬。Kenneth話呀，預算案後出爐後，唔少會計界選民都不滿當中嘅無厘頭政策，包括全民免費考DSE、向海洋泵水三億等，但無乜選民鬧佢唔支持派錢，而佢亦唔係立場一時一樣嘅人，所以無諗過改變諗法。

佢個人認為，大家現時應宏觀啲咁睇份預算案，認為政府目前最重要係定出政策指標，講清楚究竟用咁多錢投資創科，會達到乜嘢經濟效益，同時亦應考慮延長學生貸款讀書嘅還款期，以及增加在職人士嘅交通津貼等。佢仲建議未來河套區發展要以香港模式主導，包括採用香港管理、運作同法律，發展先會事半功倍喎！

為咗反映對預算案嘅意見，佢會再約財爺會面，下月四日首度喺娥特任內飯聚時亦會表達預算案意見。