金管局再度向市場注資,大市未見亢奮,但三大主題──AH差價股、殼股及盈喜股鑊氣十足,算係悶市奇葩。前兩者近期炒風不絕,可同時演繹為好消息及壞消息。好消息係戰友可集中火力喪炒,唔使藥石亂投,壞消息係炒作概念不足,市場氣氛容易轉差。
早前喺投資導航版推介億和(838)為第三季潛力股,周三觸及建議買入價1.7元後,隨即報復性反彈,現時賬面利潤有7%,半年結剛過,公司好快會再update盈喜詳情,料為今次尋頂浪催化劑,戰友可坐定定睇好戲。
噚日推介兩隻潛在殼股永利地產(864)及雅天妮(789),表現不俗,今日再接再厲,揀隻細細粒嘅恒都集團(725)。公司主要產銷用作電器及電子產品集成組件嘅電線及導線產品,以及買賣電線及導線及其他產品,近三年盈利介乎1,500萬至2,100萬銀,現價市盈率12倍,吸引力一般。但從殼股角度出發,則潛力無極限。