錢小豪近年工作移師大陸，但因疫情關係，他已在香港逗留一段時間，今日小豪到中環接受開電視梁梓禧主持《是敢的》節目訪問時，透露去年底已知道大陸出現疫情。自己工作後於1月中返港，逗留至今幾乎足不出戶，只到超市購買日常用品等物資便回家。錢小豪說：「12月在橫店開工已經知道疫情，當時香港買唔到口罩，有大陸fans送畀我，拍完戲之後返香港，武漢開始大爆發。」近日傳出大陸已控制疫情，錢小豪有點保留說：「希望資訊正確啦。」

雖然疫情影響工作，但錢小豪能接拍2020第一部香港電影《手捲煙》，他說：「開緊工有啲冒險，但基於套戲係年青電影製作人開拍，自己都係新人出身，經歷奮鬥階段，希望可以幫到新人，只係收車馬費都冇所謂。」錢小豪去年底拍攝完吳君如監製的《媽媽的神奇小子》，最後一個電影工作便停工，現在又有新戲開拍，好頭好尾，他笑言：「呢一世都冇機會再遇到，為香港年青人做少少嘢。」本來有兩套戲4月尾在大陸開拍，但相信會延期。

錢小豪17歲細仔錢穎德在英國留學，他擔心兒子安危，已安排囝囝在18號早上返到香港，現正自行家居隔離，錢小豪說：「好彩訂得快，一話停學就訂機票，所以比起正價貴少少，可以接受。」至於囝囝在香港逗留幾耐，他表示還未知道，要看疫情，並說：「多咗時間親子樂，不過囝囝返咗嚟兩日都未見過佢，因為要隔離14日，只係靠視像通訊，希望快啲過埋呢兩個禮拜可以同佢重逢。」

採訪、攝影：卓寶花

-----------------------------
第三屆最港電影大獎
按此立即投票
-----------------------------
【武漢肺炎】專頁
全民自救 抗疫資訊盡在《蘋果》