立法會選舉由兩太之爭變成八男女混戰，一眾攝石人終於搵到機會出位！大狀李永健繼早前同教育局局長孫明揚會面後，噚日再同勞工及福利局局長張建宗開會，提出有關就業同福利建議，佢哋講過乜嘢怕且大家冇興趣，不過張建宗要緊跟文革曾指示，畀足面同佢傾夠一個鐘頭。
李永健話正約見其他局長，包括林鄭月娥、俞宗怡同馬時亨，保安局局長李少光同財經事務及庫務局局長陳家強唔賣特首賬，請佢食檸檬，拒絕同佢見面。另一候選人柳玉成噚日接受香港電台訪問時，否認參選係「博宣傳」，佢話民主制度就係要確保所有人都有權參選，否則就係民主倒退。
柳玉成係唯一講普通話候選人，佢話自己由內地移居香港超過20年，可惜語言天份唔高，所以廣東話始終麻麻，但相信只要有誠意同他人溝通，講咩語言唔係障礙。佢自言有信心攞到百分之三選票，希望攞得番50,000蚊選舉按金。呢個唔係簡單任務，八方祝佢好運。