利物浦翼鋒穆罕默德沙拿今季狀態火熱，今季英超上陣15場已攻入12球，拍得住13/14球季嘅蘇亞雷斯!似乎啲紅軍球員打起咗之後，皇馬、巴塞就一定會出手，而埃及國家隊教練古柏（Hector Cuper）就爆料，話沙拿已經成為皇馬嘅收購目標。

近年好多利記球員打起咗之後，都會畀西甲雙雄撬走，最近嘅就有蘇亞雷斯，而遠嘅就有沙比阿朗素同埋馬斯真蘭奴。巴塞今個夏天仲想買菲臘比古天奴，但紅軍最終成功留人。見沙拿今季表現咁好，皇馬又似乎想出手。埃及教練古柏表示，皇馬對沙拿有興趣:「我從可信嘅渠道得知，皇馬對沙拿有興趣，但我哋冇感到特別激動。」

穆罕默德沙拿喺世盃外非洲賽區有出色演出，佢攻入咗5個入球同布基納法索前鋒拿高馬並列射手榜第一，最尾仲協助埃及自1990年以來再次打入世盃決賽周。喺C朗同賓施馬失靈之下，皇馬真係好需要沙拿加強攻力。

--------------------
係你！打造星級球隊，征服各地聯賽！立即加入『BFB CHAMPIONS 2.0』！ http://bit.ly/2xrTKGM