國慶賽馬日上演國慶盃及慶典盃，兩場輕磅馬都多，由於屬讓磅賽，往往負磅較輕賽駒能跑入前列！另外跑完第四場會轉播日本短途馬錦標，看看香港代表「有得威」能否為香港爭光！

第五場四班1600米，有匹蠱惑馬要留意，「大運舞台」今季已出賽兩次，但都是嫌短的谷草1200米，但名次不差，初出第七輸兩個馬位，上仗因排外檔縮後競跑，韋達騎後上馬打些折扣，但騎落反應凌厲，做全場最快末段跑第四。開完氣今次跑正宗路程1600米，3檔能跟能放，狀態進一步提升，望韋達再一次同葉楚航贏馬。

配腳方面，「紅衣優駿」及「津津樂道」今季已贏馬，「紅衣優駿」上仗水準高，今次增程繼續留意。「津津樂道」細馬易於季初操起，今次仍輕磅要防。「魚躍鳥歡」上季尾開始輸近，莫雷拉擺好多心機教馬，大閘大步湧上，落班須高度注視。

第十場二班草地1200米，大灰獸「平湖之星」上仗三班輕勝，梁家俊發揮一絕，他了解到馬兒逾1,300磅身形大，須展步暢順，排1檔都刻意早段移出生位，今次5檔仍靚，實力未盡可做膽。最強對手是「活力小駒」，同程相當準繩，累積四場頭馬，大閘捉到手震力壓「彪形猛漢」，十分吸引。

同場其他馬方面，「川河尊駒」上次不過不失，復課試閘餘勢甚佳，這種部署以方嘉柏來講比較少見，加開縫眼罩隨時變身。「真好彩」內檔輕磅，兩課大閘都試得好，升班仍睇好。冷要防「陀飛輪」及「英之友」，尤其「英之友」有型有款，狀態初起已經要留意。