紅遍網絡嘅「任何仁」，真係任何時候都會出場㗎喎！呢兩日天氣急速轉冷，唔少人都會攞返個暖爐出嚟用，但暖爐招致祝融之禍，時有所聞㗎喎，點樣先至暖笠笠得嚟又安全呢？估唔到全身膠質嘅「任何仁」，變身「暖男」獻妙法。

消防處喺Facebook上載「任何仁」用暖爐嘅安全方法，包括任何嘢都要同暖爐保持適當距離、使用前當然要檢查一下，到底有冇壞機？而暖爐太耐冇用嘅話，可能會有塵積聚，所以用前必定要清潔機身。部份暖爐致火災嘅意外，都因屋主用暖爐烘衫所致，所以「任何仁」都提醒大家千祈唔好試，記住要用獨立電掣，兼且出門時記得閂電掣。

但網民嘅反應，有啲錯fo喎，唔少人留意嘅係「任何仁」藍膠皮膚底，原來都有戴錶，紛紛問佢宜家幾多點（如果睇到的話...）？而「任何仁」戴住headphone睇書相，亦好多迴響，「對耳筒幾好喎，笠住對耳都聽到」。更多人則關心「任何仁」嘅安危，叫佢千萬切記，「唔好企咁埋個暖爐，因住溶咗件披...」

香港消防處Facebook專頁：任何仁の日常 – 屋企暖笠笠篇