黃貫中（Paul）、樂隊Kolor同秋紅，噚晚喺九展開騷，Paul老婆朱茵同Kolor主音Sammy老婆盧巧音（Candy）都有嚟捧場，Candy最後都忍唔住上咗台唱咗兩首歌。Paul同Kolor喺台上jam歌，唱咗好多樂隊嘅歌，Beyond嘅歌都有，Paul話：「呢幾年鍾意音樂嘅朋友唔好過，好多鍾意嘅偶像同音樂人輪住上咗上面，上帝就好啦！咁多音樂人玩音樂畀佢聽，Prince、David Bowie，以下呢個都係我好欣賞嘅歌手。」之後佢哋唱出Chris Cornell嘅《Black Hole Sun》致敬。

近尾聲大合唱時，Sammy就話台前幕後好多band友嚟咗，Paul即時對住Sammy話：「奉獻埋你個私人Band婆出嚟唱歌玩吓啦！」Candy隨即上台玩埋一份。

完騷之後，Sammy同老婆Candy齊齊接受訪問，Sammy話：「好好玩，band壇大混戰，台上好有電力。」講到Candy忍唔住上台唱歌，佢即話：「係啦！真係忍唔住，綵排時我已經心思思想上台。」只係唱兩首歌咁少？Candy話留番下次再搞騷先再唱。至於Kolor就籌備緊下年開騷，佢哋話上年搞騷蝕到入骨，成本真係好貴，生活好艱難，所以要籌備多啲時間至搞。

至於Paul就話本來叫老婆朱茵唔好嚟睇騷：「因為佢坐嘅位前面有好大喇叭，聲好大，叫咗佢唔好嚟，但佢都一定要嚟撐場。阿女太細就唔得啦！喺現場要顧住佢，我驚心散，上次個騷，個女有嚟睇，但嗰時仲細，食住薯片睇騷。」