當年今日

【面試要全裸打機】郭奕芯:有諗過爸爸入場睇我全祼好怪

蘋果日報 2015/09/30 06:00

蘋果全裸彭浩翔即時郭奕芯陸以心同班同學東京國際電影節

彭浩翔監製及陸以心執導三級電影《同班同學》,入圍第二十八屆東京國際電影節亞洲未來賞組別,獲提名最佳新導演和電影獎項。今日佢哋聯同戲中三位女主角郭奕芯、廖子妤同麥芷誼到中環公布好消息,並播放花絮分享。

為了拍攝更真摯,導演陸以心開機前同三位女主角同居幾個月,仲大爆佢哋去廁所大便唔關門等生活習慣。而片中有三位女仔素顏相處同埋電影片段,其中麥芷誼就有幕彎身向男演員下體,有所動作,其餘場面亦有不少親熱鏡頭。

喺台上分享時,三位女仔都表示難忘戲中喺天台同沙灘全祼戲,佢哋同樣希望邀請媽媽入場觀看。麥芷誼話:「試鏡過程冇同媽咪講過,後來媽咪話信任我眼光同判斷力,反變支持鼓勵我。」廖子妤回想時感觸話:「我係馬來西亞人,民風較保守,啲人會同我媽咪講你個女拍三級片,我覺得自己保護唔到屋企感覺,後來導演教我同媽咪講,我哋有出色團隊做到好作品,去令媽咪安心同支持我。」

郭奕芯話:「戲中全祼好肥,導演笑我三個波,其中一個係肚腩。有諗過爸爸入場睇到我全祼感覺好怪,亦擔心親戚睇到唔知點諗。」而戲中另一幕難忘戲,就係郭奕芯遇見王宗堯,佢要眼淚鼻涕溶為一體,但為咗效果好,幾核突都唔理得咁多。

陸以心同彭浩翔透露團隊將於十月廿二日出發赴東京參加影展,廿四號電影於當地首播,希望打開日本巿場,彭浩翔話:「套戲講援助交際,呢樣真實來自日本,回歸呢個地方播第一場電影好適合,佢哋又能夠理解題目。」彭浩翔更爆開戲前進行試鏡,要參加者全祼打遊戲機,遊戲過關後先進行傾談,目的係要觀察和測試參加者面對鏡頭過程。