中移動(941)再升0.60元,帶動恒指又創新高,升34點,呢隻中移動,唔經唔覺市值已增至13500幾億,如果真係上番80元歷史高位,甚至破埋呢個高位,市值隨時追得到巨無霸滙控(005)的17200幾億。2000年科網股熱時,中移動市值曾高過滙控,6年後估唔到中移動又有力追番上嚟。
由新地(016)負責發展,前身係九巴車廠嘅豪宅新盤曼克頓山,有報道話有個獨立屋單位以1.5萬元呎價售出,同都係新地嘅凱旋門一樣造出天價交易。受到消息刺激,載通(062)連升兩日,噚日再升6.9%,最高45元。
呢架九巴快車,趙飛雲開市無耐就追,追到氣咳先買到6000股,估唔到巴士股開車都可以開得咁快。前日搭完地鐵(066),噚日要追巴士,加埋之前坐兩轉順風機買完國泰(293)買國航(753),成手都係運輸股,個倉變咗運輸股基金。