呢期喺韓國、大陸同香港最火熱嘅韓劇應該就非由朴寶劍同金裕貞主演嘅《雲畫的月光》莫屬，呢齣劇由上月22號開始首播，暫時預計播18集，預計下月18號就會播出大結局，不過0依家劇集咁火熱，唔知劇組會唔會臨時加多兩集，再拉高收視。

現時《雲畫》都播到8集，有劇迷可能未開始煲，有劇迷可能準備煲，如果未煲嘅劇迷就可以喺呢度參考一下劇情，睇吓個故仔吸唔吸引到你煲，而已經睇咗嘅劇迷就可以重溫一下劇情。

《雲畫》係改編自尹梨修作家嘅同名網路小說作品，喺韓國勁受歡迎，由2013年10月4號至2014年10月10號連載以來，合共131回，累積點擊逾5,000萬，可見甚受韓國網民歡迎。《雲畫》故事係以19世紀嘅朝鮮做背景，講述朝鮮第23代君主純祖嘅長子李韺(朴寶劍飾)同女扮男裝入官做太監嘅洪樂瑥/洪三㖈(男仔打扮時嘅名字）(金裕貞飾)嘅宮中愛情故事。

劇情講述本身才知過人嘅李韺，因為看透官中奸臣當道、加上爭權奪利嘅事件，令到佢知道冇法靠軟弱嘅父親幫肋，所以佢就一直表現得玩世不恭，等一眾奸臣對佢唔提防。至於洪樂瑥自細就被母親強迫以男仔身份生活，由於細個時與母親失散，令到樂瑥不惜借錢去照顧患病嘅父親，亦都為錢乜都肯做，因而惹上唔少麻煩事。

樂瑥受到富家子安世河所託，幫佢寫情信畀明恩公主 (鄭慧星飾) 寫情信追女仔，點知就被李韺得知竟然有人大膽追求公主，於是李韺就出宮去睇吓邊個咁大膽。另方面，安世河就唔敢同公主見面，就叫樂瑥代佢去見公主，從而令樂瑥同李韺相遇，混亂間兩人仲一齊跌咗落個泥坑內，最後樂瑥竟然撇甩李韺自己先行離開，令二人留下牙齒印。

及後樂瑥因被債主出賣被送到宮中做太監，佢順利避過「淨身」入宮，點知就喺宮中再與李韺相遇，當時樂瑥都未知李韺就係世子，成日都被佢整蠱，又話要稱當樂瑥係寵物，最終樂瑥都得知世子身份。而李韺被委任接待來自大清嘅使臣團，以同皇帝慶祝生日，李韺喺各地招來唔同妓生表演，由於作壓軸出場嘅妓生突然失蹤，所以樂瑥即變回女仔打扮並代妓生跳舞，令李韺驚為天人，對呢位妓生留下深刻印象。

另邊廂，李韺嘅表哥兼領相嘅孫子金胤聖(鄭振永飾)，佢一早得知樂瑥嘅女仔身份，亦對樂瑥產生感情，好想保護佢。不過李韺成日霸住樂瑥，令到胤聖苦冇機會同樂瑥一齊。而李韺亦發現自己對樂瑥有好感，樂瑥因為協助內官向宮女示愛，令到現任皇后興師問罪，李韺為救樂瑥衝到佢皇后面前救出樂瑥，同時皇后亦發現李韺竟然愛戀住同性嘅樂瑥，令佢太感驚訝。

李韺掩飾唔到對樂瑥嘅感情，向佢表白愛意，仲情深咀嘴，當樂瑥都以為佢鍾意男性時，原來李韺早於樂瑥扮演妓生時就已知佢係女仔身份，而佢亦都唔介意其他人嘅眼光，只係享受樂瑥驚驚青青嘅表情，不過樂瑥就唔知道自己嘅女仔身份已被拆穿，仍然喺李韺死撐扮男生，仲誤會李韺有暗戀嘅女生，仲完全唔知就係自己，認真搞笑，最後李韺只會向樂瑥再次表白話：「我喜歡嘅女人就喺我面前。」