香港電影工作者總會春茗晚宴，今晚喺尖沙咀天文臺道舉行，任賢齊、古天樂、姜浩文、毛舜筠、余安安、凌文龍、林家棟、邵音音等等都有出席，早前邵氏女星李菁逝世，邵音音為對方辦理認領遺體手續，今日音音姐就話李菁嘅屋企人嚟咗香港，為咗處理手續，已經連續去咗好幾日差館。仲講到要清理李菁嘅屋企，因為業主都有催，音音姐仲話：「佢都住咗幾十年，都有好多嘢，啲嘢又唔可以送去紅十字會，因為李菁都過咗身幾日，啲嘢都有一陣味，最慘都係業主，層樓變咗凶宅。」

音音姐又指已經同李菁屋企人處理咗一個星期嘅後事，李菁屋企人今日會離開香港，原本李菁屋企人想帶李菁嘅骨灰去上海，不過音音姐就話：「佢(李菁)唔係好鍾意上海，所以最後骨灰就留咗喺香港。」

精選娛聞，喺晒《娛果》
http://fb.com/appledailyent