【處女下海】孖羅蘭首錄廣播劇 85歲修哥:難度梗係有
羅蘭胡楓港台廣播劇
胡楓(修哥)、羅蘭、何守信、顏卓靈同游學修等今日齊集港台,為廣播劇《廿年》錄音及舉行記招,佢哋仲即場示範一段廣播劇,風趣幽默嘅修哥不時發放笑彈,又笑稱搵唔到對白,又提醒旁邊嘅羅蘭姐講對白,而獻唱主題曲嘅太極樂隊現場演繹。
85歲修哥同82歲羅蘭姐第一次合作錄廣播劇,修哥就話自己有一段時間冇錄,所以都有一定難度,佢話:「難度梗係有,我口齒唔伶俐,不過錄緊時好專業,唔會爆肚,第一我驚人入唔到,第二驚自己撐咗出大海。」前後需要錄音兩日,羅蘭姐就話覺得錄廣播劇比演戲更難,因為要靠聲音演繹成個神髓。對於Joe Junior情況,修哥話:「佢情況非常好,一次過通咗三條血管,我就去探佢,不過佢好薄皮,見到人探就喊,我會先同佢講你喊我就喊。」
顏卓靈同游學修都係第一次錄廣播劇,游學修就話啲前輩非常專業,喺咪前走位好似耍功夫咁精彩,顏卓靈話圍讀時大家氣氛好開心,到埋位時就變得好專業,面對住前輩,顏卓靈話:「都會有緊張,尤其自己會特別注意咬字要清晰啲。」跟修哥同場,游學修笑稱唔能夠叫自己做修修,因為怕混亂,只可以叫學修或修仔。