基斯坦奴朗拿度（C朗）喺皇家馬德里以3:1擊敗多蒙特嘅歐聯分組賽梅開二度,賽後佢被問到會唔會再同呢支西甲勁旅續約嘅時候就將個波交畀會長佩雷斯，又話自己冇講過喺皇馬唔開心，仲話當你夠偉大就會有人講你。

32歲嘅C朗舊年11月同皇馬續約到2021年，雖然合約仲有三年半先到期，但佢喺今年夏天因為涉嫌瞞稅畀西班牙當局指控，有傳佢唔開心想離開皇馬，仲傳到佢可能返曼聯或者轉戰中超。但星期二皇馬贏波之後，C朗回應會唔會續約嘅問題就咁答︰「我會唔會續約？好問題。我好開心，順其自然啦，但呢個問題可能問會長好啲，佢應該識答過我。」

對於之前冇報道話佢想離開皇馬，C朗就話︰「你哋唔係聽到我講㗎，全世界人人每日都講緊基斯坦奴，如果我要答晒所有人，咁我就只係傳媒而活，但我係為足球而活嘅。任何有基斯坦奴個名都係世界新聞，當你係偉大嘅，人哋就會講你。」