前特首「煲呔曾」曾蔭權因為公職人員行為失當罪刑滿獲釋及上訴得直後,去年7月曾公開露面分享獄中感受,平日生活都甚為低調,最近接受一個由天主教徒成立嘅慈善機構「生命恩泉」訪問。獲太太全程陪伴嘅煲呔喺堅尼地道嘅前任行政長官辦公室受訪,令大家有機會一睹佢呢間過去極少曝光嘅辦公室。
片中所見,煲呔呢間辦公室除咗擺咗唔少家庭舊相,亦掛咗一幅原文來自聖馬竇福音嘅「非以役人 乃役於人」八個大字。
八方翻查資料,發現煲呔喺特首任內,透過特首辦發言人回應普選問題時,曾用上呢八個字。當時天主教香港教區主教陳日君在2005年平安夜,送咗一枚由已故教宗若望保祿二世所贈嘅「善牧」浮雕戒指畀煲呔,希望上主賜勇氣畀煲呔,向中央爭取普選。
當時煲呔被問點回應陳日君嘅期望,透過發言人表示「非以役人,乃役於人」,意思係自己唔係想要人服侍,而係要服務香港人。香港過去三位特首,僅曾蔭權任內通過一次政改方案,立法會多咗五個「超級區議會」議席,此八字長掛前任特首辦,煲呔對爭取真普選仍未絕望?
煲呔喺今次訪問中,唔見談及近日武漢肺炎疫情或者前下屬林鄭月娥嘅表現,大部份時間都係講自己嘅信仰。佢透露獄中最慘之時感覺到同天主更加接近,接觸到好多宗教書籍,越睇越有興趣。佢特別多謝陳志明神父喺佢坐監時每星期都去探佢,令佢知道若果要接近天主同做人更開心,「一定要學做聖人」。
煲呔又話,獄中亦盡力嘗試每分每刻接近天主,透露連喺洗廁所同清潔地方嘅時侯,都每分每秒唸住經,求耶穌憐憫。
-----------------------------
【武漢肺炎】專頁 全民自救 抗疫資訊盡在《蘋果》
-----------------------------
【撐學生】
召集有心人 撐學生全年睇《蘋果》
立即按此