大家都知股評人胡孟青（青姐）講股票好得，原來佢講韓星一樣可以講到唔停口，對於幾隊韓國人氣男團，佢分析得頭頭是道，如數家珍，拍得住講股。近日韓國天團BIGBANG來港開演唱會，青姐亦有一擲1,888蚊，買最貴門票去捧尾場㖭呀。
老實講，華華對韓國男團、女團真係一頭霧水，就算試過好努力去認人，都係無辦法分清楚邊隊打邊隊，邊位係邊位，真心佩服青姐仲可以分析Super Junior 、CNBLUE、EXO、BIGBANG等幾隊嘅特色，或者佢加啲冧巴落去講，華華可能會容易明白啲。

情迷Super Junior

舊年底Super Junior來港開演唱會，佢已經有去睇，之後Super Junior過大海開show，佢又去埋，BIGBANG咁紅，佢當然唔會放過喇。佢一早透過內部認購買飛，買到星期日尾場第5行，能夠近距離睇5位靚仔，難怪佢都講到眉飛色舞，分分鐘開心過買股票贏錢！
「（BIGBANG成員）太陽夠型又唱得好，（隊長）G-DRAGON rap到去美國呀……」青姐一講起自己鍾意嘅男團其實同少女講偶像冇乜分別。
不過佢話最欣賞係韓星演唱會嘅舞台設計、燈光、音效等等，覺得對方一定落重本搞好舞台效果，每次睇都值回票價，雖然佢唔識韓文，但日聽夜聽，好多韓文歌都朗朗上口㗎，咁幾時獻唱先？

李華華
mailto:[email protected]