【新增內容及圖片】

「第13屆首爾國際電視節」今日於汝矣島KBS Hall舉行，由主持人全炫茂及女團少女時代成員秀英擔任主持人。秀英率先身穿白色裙蹺住拍檔全炫茂行紅毯，不過頒獎禮開始後，就見秀英換上一條綠色Tube dress，相當性感。

韓劇於今屆頒獎禮中成績麻麻，僅得翻拍同名日劇嘅劇集《Mother》有份入圍迷你劇部門及朴敘俊、金智媛主演嘅劇集《三流之路》入圍喜劇部門爭獎，而主演《Mother》嘅女星李寶英則有份入圍角逐最佳女主角，今屆反而外國劇集入圍居多。

頒獎禮開始前，眾演員率先亮相紅地毯，不過今日天公不造美，韓國落緊勁大雨，紅地毯環節就改喺室內進行，不過室外仍有唔少粉絲喺室外擔遮等待。而韓劇《雲畫的月光》女星鄭惠成、台灣男星劉以豪、日劇《孤獨的美食家》男星松重豐、電影《死亡筆記：照亮新世紀》日本女星藤井美菜等人亦有冒雨出席頒獎禮，韓劇《大力女子都奉順》女星朴寶英雖未有行紅地毯，但亦有露肩出席盛會任頒獎嘉賓。

至於上月中宣佈懷二胎嘅39歲李寶英，亦有身穿鬆身裙現身撐場，雖然裙太長未見佢有冇着高踭鞋，不過就見佢不時摸肚。而憑熱播劇《金秘書為何那樣》而人氣急升嘅朴敘俊就壓軸出場，甫現身立即有唔少人尖叫歡迎。

而有份入圍與外國演員角逐最佳女主角嘅李寶英，成功撼贏對手獲獎，李寶英發表感言時表示：「有唔少人透過《Mother》得到慰勞、治療，我都一樣，睇完《Mother》令我成長咗，多謝一齊拍攝嘅演員、工作人員，亦好多謝鍾意《Mother》嘅觀眾。」《Mother》同樣贏得迷你劇部門獎，成為雙冠王。雖然朴敘俊主演嘅《三流之路》失落喜劇部門獎項，但朴敘俊就獲頒韓流電視劇部門嘅最佳男主角，剛出席完新片《談判》showcase嘅孫藝珍，就匆匆換衫趕到會場獲頒「韓流電視劇部門最佳女主角」獎項。

精選韓流，喺晒《娛果》
http://fb.com/appledailyent