憑出演韓國親子綜藝節目《超人回來了》而有高人氣嘅演員宋一國同三胞胎，雖然已經離開節目，但仍然都有好多粉絲支持佢哋，老竇宋一國仲特地開咗個Instagram，更新吓三胞胎嘅近況。帳戶啱啱開嗰陣就瘋狂更新，近日就少咗好多，不過事隔2星期，噚日終於再更新啦！

早前宋一國拍完韓劇《蔣英實》而放假休息，抽空同三胞胎去咗濟州島玩。而噚日上載到Instagram嘅相就係當時影落，但就只得老竇、大韓同民國嘅身影，唔見萬歲。宋一國就留言寫道佢哋當時喺中文海水浴場，又解釋粉絲嘅疑惑：「萬歲冇出到嚟，同媽咪留咗喺宿舍。」相中大韓同民國又係一模一樣嘅打扮，依然咁可愛，而兩兄弟越大就越似老竇，話唔係父子就冇人信！

另外，新一集《超人回來了》將會喺今日播出，而製作組就公開咗節目中另一人氣小孩─大發BB嘅花絮照。今集喺「叔叔特輯」，所以製作組就搵嚟韓劇《HotelKing》男星李東旭出演，照顧大發BB同4個家姐。睇相李東旭就笑得好開心，不過大發BB同兩個家姐曳起上嚟連老竇李同國都未必搞得掂，李東旭仲要冇湊B經驗，唔知會發生咩事呢？