文傳大戶作好準備
有個專做美股分析嘅朋友話，美股其實一啲都唔差，尤其係晶片股，聽聞下個星期公布業績嘅英特爾，業績會好到你唔信，所以叫伏勝留意本地嘅晶片相關股，話班大戶會借勢炒番郁啲股仔，尤其係上星期五升番上嚟嘅品質國際（243），話唔定重可以有多十零個巴仙執吓。
講開晶片股，前排國內公布成功製成由中國所開發嘅第一塊電腦晶片，雖然重未夠花旗貨撼，但已經係踏出成功第一步。喺咁多隻科技股仔之中，伏勝仍然覺得隻文傳（343）係有啲計，佢哋之前已經傳緊同美國IBM成功研製咗第一塊以中文指令為基礎嘅晶片，聽講已經快可以推出市場，可能會喺短期內作出公布。班大戶一聽到呢個消息，已經開始作好準備，炒番郁隻股仔，睇番文傳個價，的確喺上個星期已經企穩咗喺兩毫子水平，而且重有唔少見慣見熟嘅行家喺度買緊貨，如果真係要炒嘅話，相信就只要等有番多啲成交額先可以。據文傳內部嘅線人所講，佢哋好似會喺短期內有啲動作，話應該可借勢炒番上去3毫子樓上。
伏勝