梁釗峰今日到商台繼續為新歌《月亮不代表我的心》做宣傳，之前用咗五日時間，到咗近30間辦公室做巡演，當中包括紙媒、網媒及電視台等，佢話獻唱時要比平時更用力，先可以令大家投入欣賞，但當遇到對着電腦目不轉晴趕稿嘅人，佢亦唔敢打攪佢哋：「巡演中發生奇遇，我撞到一位舊同事，同埋好耐冇見嘅堂妹。」

到訪不同形式辦公室，令佢萌生想求職返辦公室職場，釗峰話：「見到辦公室啲人好後生，又靚仔靚女，有啲辦公室仲有主題房，例如叮叮(電車)，原來時下啲公司咁揼本。」釗峰自爆大學時做臨時工時，喺辦公室有「影帝」稱號，佢笑謂：「任何型號影印機換墨、jam紙都難唔到我。」佢話今次辦公室巡演，稍後就會移師到廣州進行。

精選娛聞，喺晒《娛果》
http://fb.com/appledailyent