蔡康年今晚於保良局盆菜宴上擔任司儀一職,並大方受訪講番佢喺無綫職工聯署反暴力行動上抽起簽名之因由,更拋出金句謂:「唔簽名唔代表唔支持。」、「多一事不如少一事」云云。
蔡:蔡康年記:記者
記:你所講嘅「多一事不如少一事」即係指乜嘢?
蔡:管理層都有講啦,依家件事都未係清楚,所以不如俾大家有啲空間,然後喺呢個空間裡面,先可以俾到同事去處理呢件事。等佢哋處理得性啲。立場堅定,但唔一定要企得咁硬。
記:最近忙緊乜嘢?
蔡:湊仔,個仔今年8歲喇,同埋做財經節目主持。學識少少投資,當然要交下學費事前,五位數左右,依家都叫有啲薄利,夠個仔交學費。
記:點睇余詠珊嘅每年5%換血論?
蔡:冇補充。
記:可覺公司依家人心惶惶?
蔡:呢輪見到同事,都好少討論呢樣嘢。我相信佢哋唔會存在你講呢四隻字。
記:會否擔心自己會係明年嗰5%?
蔡:既來之則安之。作為爸爸同主持人,都係做好自己本份。無論發生乜嘢事都好。有事發生,即係俾第二條路你行,唔好強求。