筆克（752）數據超吸引，加埋受惠谷內需政策，又係買嚟等爆邊。筆克主打展覽及項目市場推廣服務，08年度（10月底止），有嚟自北京奧運及星洲格蘭披治等等大型相關項目入賬，業績坐定粒六。只係好保守計數，筆克全年純利係咁意增長10%，預期PE都係3.5倍。
呢期阿爺谷內需，唔少海內外企業亦睇準內銷呢塊肥肉，對筆克主打之瓣數，長線有需求，筆克生意長做長有。以3倍PE買一家有前景嘅股票，抵到爆。筆克上半年派息3.5仙，又係好保守計數，集團08年度末期派息睇齊上半年，全年派息7仙，預測息率回報上到近15厘。
再講，筆克手頭淨現金4.9億銀，每股淨現金值幾乎等同現價（0.47元），P/B又得0.66倍，又係吸引到痹。筆克上星期尾三條平均線滙合，買嚟等爆邊，博翻一番到0.94元，PE仍未過8倍。

上海証大（755）上年6月底嘅NAV0.33元，現價（0.12元）折讓64%，而集團同期淨借貸比率，只得27.8%，財務狀況穩穩陣陣，兼已經有炒折讓條件。再講，雖然証大股價得毫幾子，但股東之一，包括復地集團呢個大牌子，股東背景唔係嘢小。而呢期資金炒落後細價股，其中，莊士中國（298）對上星期一支箭升咁幾乎升40%，証大係咁意升得6%，博炒落後，証大有得諗。短打博証大上返0.5倍P/B，股價見0.165元，回報率係37%。
錢雋