曾爵士計數點票，連同幾十份「支持意向書」，共得「選票」七百一十四，真係一票也不多，一票亦不能少，啱啱同廢董上屆一樣咁高咁大，真係吐氣揚眉！
不過，今次「選舉」，好睇嘅地方，不在於邊個提名爵士，而係親中愛國陣營之中，邊個膽大包天，敢唔提名？
除咗當年力叫香港人唔順大亞灣核電廠就去跳海嘅薛鳳旋公然叛國，提名李永達之外，赫然拒絕提名嘅幾十人，其中不乏過去八年來嘅風雲人士！
例如，在一九六七年五月反英抗暴曾慘遭港英迫害入獄嘅胡棣周，重有當年在街頭喪派愛國傳單而慘遭港英拘控嘅廢董智囊曾德成、重有反董愛國嘅雲大棉，今次都赫然齊齊拒絕提名曾某喎！嘩，真係有獨立嘅人格嘞！

若然呢三位反曾義士，將佢哋今次對港英餘孽苦大仇深，拒絕服從胡錦濤嘅獨立思考及人格，應用在「平反六四」方面，咁就會更受到六百萬港人敬重㖭！
重有，兩個公務員團體首領黃河、蘇肖娟，今次竟然亦拒絕提名㖭！咁係乜嘢意思？
至於民建聯，就一路鬧，一路半推半就咁癱軟屈服，提出條件，先友後婚，就係設立所謂「政務助理」，畀民建聯「新血」入局！不過跟住又承認，話自己冇乜英文人才，只得兩三個夠資格插戶咁講！
咁就騎呢喎！「政務助理」開多幾十個位，嗰頭公務員就會削番同樣咁多個位，咁咪變咗政客干政、破壞公務員體制？「政務助理」着數壽包，若果淨係派俾民建聯，民主派點解要喺立法會舉手通過撥款？若果立法會唔通過，最後咪一場着數咪兩頭空呢？
爵士治港，在黃色暴雨警告之中上台，八方風雨會中州。局勢凶險，薛鳳旋吹雞，老左醞釀大暴動，呢次頭痕嘞！

傳真︰2623-9278
電郵︰[email protected]