今日係特首大選日，而林鄭月娥以777票勝出，而民望最高嘅曾俊華落選，喺呢個對於香港人咁重要嘅日子，似乎大家都對呢件事十分唔上心。

就好似羅敏莊咁，佢自認政治意識低，認為邊個做特首都一樣，對港人好為港人爭取到福利就好，以往期望過高又會失望，所以現時對新任特首無乜期望，羅敏莊話：「香港好多人好似我咁，例如我唔鍾意教育制度，覺得又TSA，又迫功課，我咪揀國際學校，佢唔變我變，又例如租金太貴，或者揀去第二道住，係我去改變。」不滿教育制度，所以安排囡囡讀國際學校，呢啲咪傳說中嘅「斬腳趾避沙蟲」囉！

而同場嘅徐榮就話雖然少留意選情，但希望新任特首林鄭月娥能為港人謀更多福利，令香港更好，佢仲話：「我好自私地希望股市大升，樓價跌少少，大家可以易啲上車。」另一方面徐榮希望教育制度有改善，覺得香港好多小朋友讀書以外好有天份，希望政府可以在讀書以外幫助小朋友發展天份，讀書不是求分數。