樂壇有Twins，新聞界一樣有Twins，就係亞洲電視兩位新聞小花李卓敏同余安琪！同阿Sa、阿嬌一樣，呢兩位亞記新晉靚女記者既冇血緣關係，樣貌亦唔相似，然而衣着品味極度一致，被一班fans識穿佢哋一件衫兩份着！
八方平時睇新聞主要關心內容，其次係邊個行家做，至於記者出鏡時如何打扮甚少留意，若非電視迷提醒都冇留意。李卓敏同余安琪可以一件衫兩份着，皆因佢哋係好姊妹兼身形同樣嬌小，據講佢哋都係浸會大學傳理系03年畢業生，而且係同班同學，咁好朋友自然唔介意share衫着。

電視台行家同八方講，出鏡衫要大方得體有台型，想買到心水好衫市面難求，人工高啲嘅女主播都經常撞衫，新聞小花選擇更有限。「佢哋買嘅衫要鮮色，又要大方得體，不過人工唔高，所以好難買衫㗎。」因此唔少女記索性撈亂衫着，咁做既慳錢又多啲款式變化。
呢招可能瞞得過普通觀眾，但係瞞唔過一班電視台主播迷。近年電視新聞戰白熱化，八方知道兩個收費新聞大台女主播都有服裝公司贊助，兩間免費電視台新聞部就未有，小花惟有出此對策啦。