【李八方online】殺鼎鼎 煞停政府開位！
蘋果日報 2019/12/18 12:36
立法會周浩鼎李八方ONLINE測量師人事編制小組
唔係八方專登搞針對，而係民建聯周浩鼎嘅表現真係太過出色。今朝佢主持立法會人事編制小組，傾發展局同地政總署各開一個測量師職位，得一個議程咁大把，結果都搞到俾民主派突襲成功，否決咗個撥款。鼎，真係多謝晒你﹗
其實政府開呢兩個測量師位，主要係想做下類似Google Map嗰啲三維數碼地圖，爭議性就唔係好大，民主派嘅訴求只係想將兩個職位分開表決。
好歹都做咗成年人事編制小組副主席嘅阿鼎，今年爭咗個主席嚟做，結果做成點？今朝個會去到加時階段先投票，阿鼎又唔數下票，不知就裡，結果一舉手，投反對嘅民主派多過投支持嘅建制派，咁咪否決咯，連宣佈結果嗰陣都要秘書提醒，佢先知道係否決。
查實無論做主席、議員抑或做官，都要識數票，明知唔夠票又照投，咁咪攬炒囉！八方綜合唔少建制派做主席時，一旦發現唔夠票，咪拉下布，話既然個會就嚟夠鐘，不如下次開會先投票啦，再唔係就問下有冇人要記名表決囉！除非阿鼎經歷區選大敗有覺醒，做咗無間道啦……