當李克勤同容祖兒嘅獨唱部份完咗之後，佢哋兩個就開始合唱，合唱哥哥張國榮同梅姐梅艷芳嘅《緣份》，其後再合唱《世界真細小》，克勤就喺後面攬咗Joey一下，兩個又拖咗一陣手，係繼開場跳舞之後，再一次嘅身體接觸。

合唱完之後，克勤同祖兒就第一次開口講嘢，克勤就話：「愛情係最浪漫，都係最現實，大家嘅愛情故事都係好似我哋咁，有開心、有唔開心、有出賣、有離合、都有掛念，而最重要就係珍惜。」之後祖兒就開口話：「嗯，冇錯，珍惜，希望大家都珍惜你愛嘅人同愛你嘅人。」之後兩個就合唱《紙牌屋》，唱完之後兩個抱抱，拖住手降返落台。

到encore環節，兩人再度出場，克勤即笑道:「嗌啦嗌啦，你哋大聲嗌啦!一次過嗌晒佢!」即全場歡迎。克勤再謂:「之前係pre-show，o依家先至係正式開始，你哋邊個啲飛喺南亞裔嗰度買o架？」祖兒即話:「邊個係$7,800買張飛？」克勤笑言:「傻嘅咩？」之後克勤繼續話喇:「好奇怪演唱會係唔講嘢嘅呢？因為好聽到沒話說。」最後三字係講普通話。

祖兒就話:「好開心，唱到自己喊，因為太投入喺呢個愛情故事入面。」克勤即問:「你唱咩歌呀？」祖兒即答:「《爭氣》。」克勤就話:「我喺下面食緊飯喎。」祖兒即反擊:「咩呀？你『咩』嗰陣我都去咗小解啦。兩個人一齊做演唱會真係好。」

到講鳴謝名單時，祖兒特別提到助手Sandy:「因為佢陪我買呢個演唱會嘅嘢，冇咗佢，好多時我都唔知道點算。」克勤聞言即謂:「我當然唔係第一次認識Sandy，不過排舞嗰陣成日見到佢繑住手望實我，好似我陀累你咁。」祖兒即解釋:「呢啲係佢小動作嚟啫，唔使理佢。」

克勤再謂:「有一個人，其實我都好想多謝。」祖兒即問:「盧淑儀？」克勤就話:「係咪開始講呢啲先？你唔夠我講o架喎!」祖兒即縮:「我知我知，唔使講喇……」之後兩人合唱Medley，又走到觀眾席同歌迷握手。