韓國男星朴寶劍近日憑人氣韓劇《雲畫的月光》而人氣急升，更獲多個品牌邀請擔任代言人，而佢早前再落實成為皮膚醫學品牌「VPROVE」嘅首位代言人，力證其人氣。品牌方面指朴寶劍嘅開朗、正直形象同品牌形象相近，所以邀請朴寶劍擔任代言人，品牌又指日後將會舉行多種宣傳活動，粉絲或者又有機會近距離見吓偶像喇。

而演而優則唱嘅朴寶劍，早前為《雲畫》錄製OST《我的人》，歌曲於今早凌晨零時正式公開，粉絲嘅反應亦相當熱烈，令歌曲公開僅2個鐘已經喺Melon、Genie等多個韓國國內音樂平台獲得第1名，相當厲害，而截至韓國時間6點，仍然成為5個音樂平台嘅榜首！

另外，韓國調查機構Good Data Corporation今日發表10月首周嘅「電視藝人一周話題榜」結果，朴寶劍憑《雲畫》以1,273.6分繼續成為劇集部門話題榜嘅榜首，而劇集拍檔金裕貞就以839分排第3。趙正錫同孔孝真就憑《嫉妒的化身》分別以902.7分及819分排第2、第4名，第5名就由韓版《步步驚心》嘅李準基獲得。